የኢትዮጲያ ህክምና ማህበር በዶክተር ንጉስ ሸጋው ሞት የተሰማውን ጥልቅ ሀዘን ይገልጻል

ዶክተር ንጉስ ሸጋው ከባህር ዳር ከተማ 43ኪ.ሜ ርቆ በሚገኘው አዴት ሆስፒታል ለህብረተሰቡ አገልግሎት የሚሰጥ ባለሙያ ነበር፡፡ ባጋጠመው የደም ካንሰር ህመም ምክንያት በጥቁር አንበሳ ሪፍራል ሆሰፒታል ውስጥ ህክምናውን ሲከታተል ቆይቷል፡፡ በተደረገለት ምርመራም የህመሙ ደረጃ ወደ ውጪ ሀገር ሄዶ መታከም እንዳለበት የሚያሳይ በመሆኑ በቤተሰቦቹ እና በሙያ አጋሮቹ ለመታከሚያ የተጠየቀውን ገንዘብ የማሰባሰብ ስራ ሲካሄድ ቆይቷል፡፡

በዚሁ አጋጣሚ ማህበራችን ሀኪሞች እና ሌሎች የጤና ባለሙያዎች ተመሳሳይ ሁኔታ በሚፈጠርበት ወቅት የጤና መድህን ዋስትናችው መጠበቅ እንዳለበትና የህክምና ወጪአቸው ሊሸፈንላቸው እንደሚገባ ያምናል፡፡ ሆኖም በዚህ ሰዓት ይህን አገልግሎት ሊየገኙ የሚችሉበት አሰራር እስካሁነ ተግባራዊ አልተደረገም፡፡ ከዚህ ጋር በተያያዘ ለሃኪሞች ብሎም ለጤና ባላሞያዎች የጤና መድን ሽፋን መተግበርን እና መሰል ጉዳዮችን በተመለከተ ሴክተር መስሪያ ቤቶች በዘላቂነት መፍትሄ እንዲያበጁ ለማሳሰብ እንወዳለን፡፡ ማህበሩም ይህንን በተመለከተ በቋሚነት መፍትሄ ለማምጣት የጀመርነውን እንቅስቃሴ ከሚመለከታቸው አካላት ጋር በመሆን አጠናክረን እንቀጥላለን፡፡ ለዶክተር ንጉስ ሸጋው ቤተሰቦች፣ ወዳጅ ዘመድ እና የሙያ አጋሮች መጽናናትን እንመኛለን፡፡